इंदापूर: श्री. आर. के. शहा विद्यालय, इंदापूर येथे भारतीय स्वातंत्र्य दिन अत्यंत उत्साहात आणि विविध उपक्रमांनी साजरा करण्यात आला. संपूर्ण देशभरात स्वातंत्र्यदिनाचा उत्साह असताना विद्यालयातही राष्ट्रभक्तीचे आणि विविध उपक्रमांचे वातावरण पाहायला मिळाले. कार्यक्रमाच्या सुरुवातीला संस्थेचे अध्यक्ष ॲड. श्री. गिरीश शहा साहेब यांच्या शुभहस्ते ध्वजारोहण करण्यात आले. ध्वजारोहणानंतर राष्ट्रगीत व ध्वजगीताने परिसर दुमदुमून गेला होता.
या प्रसंगी कार्यक्रमासाठी प्रमुख पाहुणे म्हणून जीवनगौरव पुरस्काराने सन्मानित कै. अंकुशराव काळे यांचे चिरंजीव श्री. अर्जुन अंकुशराव काळे, ॲड. श्री. आनंद अंकुशराव काळे आणि त्यांचा संपूर्ण मित्रपरिवार विशेष रूपाने उपस्थित होता. कार्यक्रमादरम्यान उपस्थितांनी कै. अंकुशराव काळे यांच्या सामाजिक आणि शैक्षणिक योगदानाचे कृतज्ञतापूर्वक स्मरण केले.
आपले संपूर्ण आयुष्य सहकार, शेतकरी, कष्टकरी चळवळ आणि शिक्षण प्रसारासाठी वेचणाऱ्या सामाजिक कार्यकर्ते कै. अंकुशराव काळे यांच्या स्मृती जपण्यासाठी आणि विद्यार्थ्यांमध्ये वाचनाची गोडी निर्माण व्हावी या उद्देशाने काळे परिवाराच्या वतीने विद्यालयाच्या ग्रंथालयासाठी विविध विषयांवरील पुस्तकांचा संच भेट देण्यात आला. "हार-तुऱ्यांपेक्षा पुस्तकांची अमूल्य भेट ही कधीही अधिक मौल्यवान असते," असा मोलाचा संदेश या उपक्रमाद्वारे देण्यात आला.
ध्वजारोहणानंतर शालेय विद्यार्थ्यांनी अत्यंत शिस्तबद्ध पद्धतीने प्रभात फेरी काढली व देखणे संचलन केले. तसेच विद्यार्थ्यांनी सादर केलेल्या विविध कवायतींनी उपस्थितांना मंत्रमुग्ध केले. विद्यार्थ्यांनी स्वातंत्र्यदिनानिमित्त उत्स्फूर्त भाषणे सादर करून उपस्थितांची मने जिंकली, ज्यांचे प्रमुख पाहुण्यांसह उपस्थितांनी मनापासून कौतुक केले.
स्वातंत्र्यदिनाचा आनंद द्विगुणीत करण्यासाठी 'नाकोडा ड्रेसेस'चे मालक श्री. नाकोडा शेठ यांच्यातर्फे सर्व विद्यार्थ्यांना लाडू वाटप करण्यात आले, तर श्री. अमन अस्लम चौधरी यांच्याकडून केळी वाटप करण्यात आले. या कार्यक्रमास शाळा व्यवस्थापन समितीचे अध्यक्ष, उपाध्यक्ष, सर्व सदस्य, मुख्याध्यापक, शिक्षक वृंद, शिक्षकेतर कर्मचारी, पालक आणि विद्यार्थी मोठ्या संख्येने उपस्थित होते. कार्यक्रम यशस्वी पार पाडण्यासाठी विद्यालयाच्या मुख्याध्यापकांसह सर्व शिक्षक व कर्मचाऱ्यांनी विशेष परिश्रम घेतले.
